معلم سابق بمدرسة الإصلاح الزراعي بنجع حمادى
محافظة قنا جمهورية مصر العربية
دى كانت النهايه
مش هقولك اعذرينى
مش هقولك عايز السماح
مش هقولك غصب عنى
عنك بعدت وطيفك راح
مش هقولك شىء غصبنى
انى اسببلك فى الجراح
مش هقولك سامحينى
على اللى فات منى وراح
مش هقولك فكرى
فى أيام كانت براح
مش هقولك ارجعيلى
الباب اتقفل وضاع المفتاح
كنت أسى لكن عنادك
خلانى انسى نور الصباح
كنتى حاده فى النقاش
مش كلام دا كان صياح
كل طلباتك مجابه
كنت كلى ليكى مباح
اخذتى حبى على أنه ضعف
وضغطتى على كل الجراح
فهمتى اسلوبى غلط
كلامك لى كان رماح
دى كانت النهايه
مش هقولك أنا نادم
أو عايزك ترجعيلى
ولا هقولك انى راجع
خلاص ما بقيتيش تنفعيلى
طريقك غير طريقى
لا بسمعك ولا تسمعينى
انتى غرب وانا شرق
استحاله هتلاقينى.
انتى ليل وانا النهار
فى الحلم بس هتشوفينى
روحى خلاص انا مش ليكى
رغم انك هتوحشينى
ليست هناك تعليقات:
إرسال تعليق