مجلة ياسمينتي الادبية

- بياع الصبر -

(١)

دلوني على الصبر فين أراضيه ؟

مخاصمني من زمان ..

قولولي هو فين ..

وأنا أراضيه 

ولو فى حد يبيعه ..

أشتري منه وأرضيه

(٢)

نصحوني .. وراضوني ..

ولطريق الصبر دلوني 

وكان طريق شوفته بعيوني 

وخدوني من إيدي وفهموني

وعشان ماتعبش علموني 

 ولكل شبر فى الطريق رسوني

(٣)

وعشان أشتري صبر  ..

إدوني مفتاح وقالولي : فيه السر

 قلت : أنا عايز صبر 

مالي ومال مفاتيحكم 

 قالولي : ده مفتاح الرضا 

يقفل كل بيبان الحزن 

ويفتح كل بيبان الهنا 

(٤)

أخدت مفتاحي ..

وقفلت باب من بيبان الحزن

وكأني شايل فى إيدي سلاحي

وبان قدامي الصبر  ..

فى أعلى درجات الحسن 

(٥)

اقفل بإيدك كل بيبان الحزن 

ده قفلك لباب واحد 

يفتح فى وشك كل بيبان الهنا

اقفل كل البيبان 

إللى يدخلك منها حزن 

تلاقي السعد يقولك : يا هلا 

(٦)

خليك دايما بأمر الله .. راضي 

وحاول تسعى بين الناس وأنت .. راضي

وعمر قلبك بذكر الله .. اوعى تخليه فاضي

(٧)

بالرضا تشتري من الصبر قناطير

وتكون فى دنيتك مالك كل الخير 

وفى آخرتك تنول رضا الرحمن 

وتفوز بنعيم جنته وتدخل زى الطير

 --------

بقلم/ محمدالهادي.