(1)
قالوا : جدك مات ..
قال : سنة الكون
وع الكل دايرة
أدى المهمة .. وأنهى الرسالة
وعاش لحد ماشاف عز أولاده
وشال بإيده كل أحفاده
وراح ل.. رب كريم
مبسوط وراضي
وربه عنه .. راضى
(2)
قالوا : أبوك مات
قال : راح الجدار
إللى كنت عليه مسنود
راح الأمان م الدار
الأمان إللى خلانى
حاسس إنى موجود
راح الخير
إللى ما كان له حدود
راح المفتاح
إللى كان بيفتح لى أى سدود
راح العطاء
إللى ما كان له ردود
راح وسابنى لوحدى
راح وسابلى دوره
وأسمع زيه كلمة جدى
راح ودعايا له ممدود
(3)
قالوا : أمك ماتت
قال : مش عارف .. ماصدقتش .. ويمكن ماسمعتش ..
فروحت لها .. وهمست لها :
أمى ... أمى ..
ولأول مرة ... ماتردش
كدبت نفسى .. وكدبتهم
كدبتهم .. كلهم
وقلت : أمى نايمة .. ما ماتتش
ماحدش صدقنى
وخدونى بعيد عنها
وعملوا قدامى حاجات ..
على بالى ماخطرتش
لحد مافوقت ويادوب استوعبت
وغصب عنى آمنت
وحاولت أرضى ...
وكأنى من جوه .. مارضيتش
بس ف الآخر ..
رضيت .. واستغفرت .. وآمنت
(4)
قالوا : ابنك مات
قال : وديعة
واستردها صاحب الأمر
وحكم الله نافد ع الكل
وأكيد .. هيكون لى شافع
يوم الحساب والفصل
وربنا وحده أقدر
يخفف حمل الهم
عشان الواحد بعد فقد الابن
بيحس بغربة ويتم
وسبحانه ... يعين القلب
إللى كان عشمان يشيله
إللى كان مسميه عكازه وإيده
لما يلاقي نفسه بيشيله بإيده
(5)
قالوا : أخوك مات
قال : ضهرى انكسر
وكيف لما أتوجع
أقول تانى : أخ ؟؟؟
وكيف أمشى بين البشر
وضهرى مكشوف من غير ستر ؟
الأخ هو السند
الأخ هو الضهر
(6)
قالوا : أختك ماتت
قال : راحت الأم التانية
إللى إيدها كانت حانية
راحت إللى شايفة طلباتى
وتفكرنى بكل التزماتى
راحت وربنا يصبرنا
لحد ما نتقابل فى جنة باقية
(7)
قالوا : مراتك ماتت
قال : راحت الأنيسة المؤنسة
مشجعتى الوحيدة المتحمسة
إللى آمنت بفكري من غير وسوسة
راحت وعزايا إنها سابت
حتة منها .. وزيها مسمسمة
(8)
قالوا : عمك مات
قال : دمى وراح لمولاه
يلا ندفنه ونودعه ل.. مثواه
وربنا يرحمه ويحسن ختامنا
ويجعل الجنة سكناه
(9)
قالوا : خالك مات
قال : ما تجوز عليه إلا الرحمة
ويلا نلحق العزا قبل الزحمة
وتتلاقى الوشوش يوم المرحمة
واللى له حق ياخده من غير منقصة
(10)
قالوا : أنت مت .. الله يرحمك
قال : دنيا فانية
والموت فيها زى القطر
وكل واحد هينزل
فى محطة بالساعة والثانية
والحمد لله وحده
إللى بارك لنا فى العمر
ولنا رجاء فى نظرة رضا منه
وندخل جنته من باب الشكر.
ليست هناك تعليقات:
إرسال تعليق